Возбранный чудотворче и предивный постниче, великий угодниче Христов, преподобне отче Тихоне, граду и стране нашей источаяй многочудесныя цельбы и милости, восхваляем тя любовию, достохвальне; ты же, яко имея дерзновение ко Господу, от всяких нас бед свободи, да зовем ти: Радуйся, преподобне отче наш Тихоне чудотворче.

Ангелов Творец, в Троице Бог славимый, предуведевый чистаго сердца твоего изволение, показа тя мирови истиннаго ревнителя благочестия и добродетелей подвижника, вся земная вменившего в уметы. Того ради мы, любовию побеждаеми, вопием ти сице: Радуйся, богоносне, небесный человече; Радуйся, земный ангеле. Радуйся, обиталище Пресвятаго Духа; Радуйся, яко Бога ради отечества страну оставил еси. Радуйся, яко в пустыню вселился еси; Радуйся, яко слезами оную напоил еси. Радуйся, яко теми оную многоплодну сотворил еси; Радуйся, яко Божественными песнопении сию просветил еси. Радуйся, яко в той ученик стадо собрал еси; Радуйся, яко страху Божию тех научил еси. Радуйся, яко и ныне непрестанно молишися ко Господу о совершающих благочестно память твою; Радуйся, яко и нас соблюдаеши от врагов видимых и невидимых. Радуйся, преподобне отче наш Тихоне чудотворче.

Видяще, яко дана тебе бысть от Господа, преподобне отче наш Тихоне, благодать подавати скорое вспоможение всем, с верою к святым твоим мощем приходящим, и содевати преславная чудеса, мы, веселящеся, яко имеем таковаго милостиваго помощника, прославляем всесильнаго Бога и вопием Ему: Аллилуиа.

Силою, данною ти свыше, блаженне Тихоне, долготу летнюю, пустынное озлобление и в потребных скудость пред очима имея, терпел еси благодарно, и тем Христа обрет в души твоей, Тому выну воспевал еси: Аллилуиа.

Имуще тя воистинну, отче Тихоне, подвижника крепкаго и молитвенника бодраго, и мысленно взирающе на досточудныя твоя подвиги и труды, мы, любовию твоею побеждаеми, умильно вопием ти сице: Радуйся, яко ангельски на земли пожил еси; Радуйся, яко жития чистотою страну нашу просветил еси. Радуйся, яко тяготу вара дневнаго понесл еси; Радуйся, яко слезными потоки землю сердца твоего напоил еси. Радуйся, яко теми лукавых духов ополчения попрал еси; Радуйся, яко молчанием язык обуздал еси. Радуйся, яко благою жизнию твоею образ терпения и смиренномудрия нам явил еси; Радуйся, яко высоту добродетелей достигл еси. Радуйся, яко восприял еси Святаго Духа озарение; Радуйся, яко воистинну честна смерть твоя, преподобне. Радуйся, яко и по смерти с нами пребываеши; Радуйся, яко верно почитающим тя во всяких нуждах помогаеши. Радуйся, преподобне отче наш Тихоне чудотворче.

Буря недоумения смущает ум наш, како бо возможем исчислити подвиги твоя, блаженне Тихоне: бдение и сухоядение, непрестанныя молитвы и прочия добродетели; но мы дивно Богу, в тебе прославляющемуся, дерзаем воспевати: Аллилуиа.

Слышавше ближнии и дальнии, преподобне отче наш Тихоне, ангелоподобное твое житие, и яко молитвою твоею мнози, с верою притекающии к раце мощей твоих, исцеление приемлют от разнообразных недугов, благодарно воспоминающе о толиких твоих благодеяниих, радостно взывают к тебе таковая: Радуйся, недугующих врачу; Радуйся, скорбным сострадателю. Радуйся, в душевных и телесных немощех скорый целителю; Радуйся, елей милости подающий. Радуйся, светильник, благочестием сияющий; Радуйся, яко древо благорасленное при водах. Радуйся, яко многи ветви добродетелей израстил еси; Радуйся, яко под сень пустыни твоея хотящих спасения приимал еси. Радуйся, яко о тех молитвенник тепл в жизни твоей был еси; Радуйся, яко благими делы душу твою украсил еси. Радуйся, яко велику благодать и силу от Бога приял еси; Радуйся, просящим милости подателю. Радуйся, преподобне отче наш Тихоне чудотворче.

Боготечная звезда явился еси во стране нашей, наставляя всех на путь спасения; призывающих бо тя вскоре предваряеши и от всяких бед и напастей избавляеши, верныя же научаеши спасающему тобою Богу взывати: Аллилуиа.

Видевши российстии народи богоспасаемыя страны сея пречудное по Бозе житие твое, Тихоне преподобне, яко аще и последи лет нам возсиял еси, но древних отец чести сподобился еси, дарования чудес достойно приим от Бога, того ради научишася пети тебе: Радуйся, великий Богу угодниче; Радуйся, яко во временней жизни, любве ради ко Господу, выну во спасение души твоея трудился еси. Радуйся, яко Его же помощию оставль тленная стяжал еси блага неистленная; Радуйся, яко благодатию Божиею сподобился еси стояти у Престола Владычня. Радуйся, яко тако сподобился еси быти причастником славы вечныя; Радуйся, тамо получивый благодать ходатайствовати о нас. Радуйся, скорый помощниче призывающим тя; Радуйся, готовый пособителю христианом. Радуйся, православному нашему царству защитителю; Радуйся, многая чудеса благодатию Святаго Духа содеявый. Радуйся, тем слепым прозрение подаваяй; Радуйся, хромым хождение исправляяй. Радуйся, преподобне отче наш Тихоне чудотворче.

Проповедует Калужская наша страна труды твоя и подвиги, богомудре Тихоне, подъятые тобою душевнаго ради твоего спасения, егоже ради прослави тя Господь славою благолепною. Темже в пустыни яко древо благоплодовитое явился еси, от негоже духовно питаемся, благодаряще Бога и вопиюще к Нему: Аллилуиа.

Возсия православней российстей земли нашей просвещение совершенных твоих добродетелей и чудес, преподобне отче Тихоне, о нихже благодаряще Бога, давшаго тебе таковую благодать, к тебе, яко к теплому о нас молитвеннику, радостная воспеваем, глаголюще: Радуйся, живый ангельски на земли; Радуйся, от страстей греховных себе удаливши. Радуйся, образ истиннаго терпения бывый; Радуйся, совершенное смирение нам в себе явивый. Радуйся, наставниче спасению; Радуйся, грешных приводяй ко исправлению. Радуйся, Христовых заповедей исполнителю; Радуйся, душ немощных целителю. Радуйся, лукавых духов прогонителю; Радуйся, благочестия ревнителю. Радуйся, неоскудный милости подателю; Радуйся, благих желаний исполнителю. Радуйся, преподобне отче наш Тихоне чудотворче.

Хотя избран дом Духу Святому себе сотворити, потщался еси тесным и прискорбным путем, ведущим в жизнь вечную, ити, еже благодатию Божиею от юности твоея совершив непорочно, тем достигл еси в небесном всерадостном пребывании воздаяния, и тамо благодарственно поеши Богу: Аллилуиа.

Новую благодать показа всех Владыка тебе, богомудре Тихоне: многая бо и преславная чудеса в мире живущим людем действуеши и скорым твоим ходатайством пособствуеши. Темже вопием тебе таковая: Радуйся, иноком добрый наставниче; Радуйся, пустыню имевый яко тихое пристанище. Радуйся, яко в той аки безплотен пожил еси; Радуйся, аки многомятежие мира презрел еси. Радуйся, непостоянную суету яко прах вменивый; Радуйся, яко к премирным ум твой возвел еси. Радуйся, яко безмолвием воздержал еси телесныя чувства; Радуйся, яко тем Богу угодил еси. Радуйся, ангельскую жизнь стяжавый; Радуйся, яко ко отшествию от мира сего всегда себе готовил еси. Радуйся, яко благими делы душу твою украшал еси; Радуйся, о людех неложный молитвенниче. Радуйся, преподобне отче наш Тихоне чудотворче.

Странное чудо и выше ума: ты бо преславную от Бога прием благодать, с верою прибегающим к тебе источаеши дарования исцелений, преподобне отче Тихоне; сего ради славит тя священная твоя обитель, идеже положено святое твое тело, и мы, усердное моление зде приносяще, благодарим прославльшаго тя Господа и выну вопием Ему: Аллилуиа.

Всякия болезни наша и печали утоли, великий наш заступниче, преподобне отче Тихоне, и подаждь нам последовати твоему житию, славу земную ни во чтоже вменяти и честь временную презирати; тоя бо ради добродетели прослави тя Бог на небеси, идеже ныне Ему ты предстоиши и непрестанно воспеваеши: Аллилуиа.

Вития многовещанныя недоумеют достойно славити тя, преподобне отче Тихоне, ибо многая и преславная чудодействия источаеши благо-датию Божиею. Мы же, любовию побеждаеми, дерзаем пети тебе сице: Радуйся, слепых просветителю; Радуйся, хромых исправителю. Радуйся, разслабленных целителю; Радуйся, злых помыслов прогонителю. Радуйся, скорбящих утешение; Радуйся, яко хульныя уста вражия заградил еси. Радуйся, яко ослабленная сердца к вере и упованию наставил еси; Радуйся, яко твоими молитвами тех спасл еси. Радуйся, яко тьму суеверия прогнал еси; Радуйся, яко к небесному свету многих направил еси. Радуйся, светильниче, сияющий добродетельми; Радуйся, единаго Бога истинный исповедниче. Радуйся, преподобне отче наш Тихоне чудотворче.

Спасти хотя душу твою, преподобне отче Тихоне, в юности возраста своего оставя отечество твое и страну, достигл еси царствующаго града Москвы, и конечнаго ради смирения своего восприяв иноческий образ, вселился еси в пустыне, идеже устроив храм боголепнаго преображения и собрав ученик множество, богоугодно подвизался еси в посте и воздержании, терпя различная искушения благодарно и работая Господеви, Емуже на небесех предстоя, ныне вопиеши: Аллилуиа.

Стена твердая явился еси всем человеком, к заступлению твоему прибегающим, преподобне отче Тихоне, темже и нас, к тебе притекающих и твоея святыя помощи просящих, от всяких бед и напастей заступай и ограждай, за еже мы вопием к тебе таковая: Радуйся, богатства мира сего возненавидевый; Радуйся, нетленная сокровища на небесех возлюбивый. Радуйся, единаго безценнаго бисера Христа Бога приобретый; Радуйся, иноческую нищету возлюбивый. Радуйся, яко с тою во все дни иноческия жизни твоея пребыл еси неразлучно; Радуйся, яко тою стяжал еси богатая сокровища на небеси. Радуйся, яко ангельския достигл еси чины, ихже житию непорочно поревновал еси; Радуйся, яко уневестил еси душу твою жениху Христу. Радуйся, яко от Него на небесех обрел еси мзду трудов твоих; Радуйся, яко вшел еси в радость Господа твоего. Радуйся, яко тамо наслаждаешися вечныя славы Его; Радуйся, преподобне отче наш Тихоне чудотворче.

Пение благодарственное Христу Богу, тя, преподобне отче Тихоне, прославляющему, вси православнии возсылают, яко Господь даровал есть ти многих чудес силу всякия недуги исцеляти. Ему же ты предстоиши у Престола Его на небесех, нас же земных всех научаеши в Троице Единому Богу воспевати: Аллилуиа.

Светозарным светом блистает преславный храм твой, преподобне отче Тихоне чудотворче, имея цельбоносный твой гроб, яко светильник пресветлый, да входяще видим, и благоговейно чествуя тя, дерзаем глаголати тебе: Радуйся, светильниче света небеснаго; Радуйся, яко лучами святыни твоея нас озаряеши. Радуйся, яко блистанием чудес твоих нашу страну просвещаеши; Радуйся, яко притекающих к тебе утешаеши. Радуйся, врачу душ наших благоприятнейший; Радуйся, скорбящих грехами всерадостное утешение. Радуйся, отчаянных надежда спасения; Радуйся, обидимых скорый заступниче. Радуйся, правды истинный хранителю; Радуйся, крепкий наш столпе и забрало. Радуйся, пламень, пожигаяй злочестие; Радуйся, росоносный облак благодати, возращаяй благочестие. Радуйся, преподобне отче наш Тихоне чудотворче.

Благодать, данную тебе от Бога, преподобне отче Тихоне, сведуще, тебе нашего милостиваго отца прилежно просим: пролей ныне теплую твою молитву о нас грешных ко Господу, да утвердит и укрепит нашу страну российскую, церковь же святую и веру православную да сохранит и вся православныя христианы помилует, всегда вопиющия Ему: Аллилуиа.

О великий и преславный чудотворче и заступниче наш, Тихоне блаженне! Приими сие приносимое тебе моление и благоприятным твоим ходатайством умоли Господа Сил всем нам избавитися от всяких скорбей, бед и напастей, и грядущая в небесных благая улучити вопиющим Ему: Аллилуиа.